بعد موضوعي الأخير (ص د ا ق ة ) حسيت من الناس اللي قراو وماردوا أنهم أكتأبوا من الموضووع ..
فجايبتلكم موضوع ..على خفيف .. أتمنى أنو يحوز اعجابكم …. وباللهجة العامية عشان يكون سهل أكثر ..

أنا والمركّب ( المركّب يعني مطبخ .. وهذي الكلمة من اللهجة المكّاوية ) .. قصة لاتنتهي .. ممكن كتير منكم يقولوا : ايش الجديد .. مو بنت ..

لا انا اقلكم الحكاية .. أنا ياحبايب مااحب شغلات البنات كثير  يعني شعر ووصفات وترتيب وديكور ودي الخرابيط .. أكرهها .. أما اللبس والمكياج .. فأنها مضطرة تبقى في اهتماماتي .. ولا ياكلوني الناس بلسااانهم .. الشي الوحيد اللي حسيته يتناسب مع أنوثتي هوااا .. حبي للمركّب .. فمن يوم ما كنت صغيرة حبيت أتابع لفة الفرموزة والمنتو والكبة (أكلات شعبية بعضها ينتمي للبخارية).. وكيف تصير الطبخة دي والكيكة ديك .. كبرت وحبيت المركّب أكثر واكثر .. وصار شغلي متقن .. وأمي الله يجزيها خير ماقصرت معايه .. علمتني .. وأدتني الجمل بما حمل .. فصار الطبخ عندي من الهوايات الكثيرة اللتي أحبها ..
واكثر .. وانتقلت الهواية لبداية الأحتراف .. ماشاء الله .. فصار شغلي ماينزل عن مرتبة ممتاز .. وكأنو طبخ الوالدة .. ويدك حلوة .. ومسبببببببك .. ويديكي العافية وتسلمي ….

ولما كان طبخي وصل لدي الدرجة .. أخذت بزمام المطبخ وصرت راعيته .. بس طبعا الخبرة ليها دورها ..عشان كدا مااقدر أستغني عن الوالدة ( الله يديها العافية وطولة العمر ) وكثير ماتتعكس الطبخة وتجي الوالدة بيدها الحلوة تزبطلي هيااا …

احيانا مررة أضايق لما أحس انو مسؤولية المطبخ صارت فوق راسي .. واحيانا أفرح لما الاقي كل العائلة تآكل بالشهية المعتادة لها .. والعبارات الحلوة تنصب على أذني زي العسل .. ولما مايقولوا ..  اجلس على

راسهم الين مايقولولي .. والله أتعودنا على طبخك عشان كدا ننسى .. بس فيين مايهربوا مني …

لب الموضوع .. كثير بنات يعتبروا المطبخ زي القبر .. من كثر مايكرهووا .. وأنا أوافقهم .. لأنو مو أي أحد  يقدر يستحمل ريحة الكشنة والزيت .. وزي ماانا اكره الترتيب والديكور والشغلات دي .. هما يكرهووا المطبخ ..

بس ماأقول غير اللي يقوله الوالد الله يخليه لينا  .. طريق الرجل يمر بمعدته ..  وتفيدي نفسك يابنتي …

نقطة أخرى .. انو بعض الستات الكبار الله يهديهم يكرهوا الواحد ة من المطبخ من حكاويهم .. لأنه في أرتب الأماكن .. وأحسن المناسبات .. تلاقيهم يتكلموا الطبخة الفلانية .. وتحطي طماطم ولالا !!!!!

ياناااااااااااااااااس .. تطبخوا في بيتكم و توصفوا الطبخ عند العالم .. والله مايصير ..

هادي كلمتين على خفيف .. للجنس الناعم .. هوا صح احيانا نحس الشغل دا واجب لابد منه .. بس لما تستمتعي بيه ح تحسيه حلو .. وممتع .. وممكن تحطي وانتي بتشتغلي الألبومات المفضلة ليكي .. ح تحسي أنو الشغل يخلص أسرع من الوقت العادي ..

وسلامتكم …

والله يوفقكم ياارب…