قبل يومين فقط .. كنت مع أخي نتبادل الأحاديث .. إلى أن ارتفع صوت أذان العصر مختلطا بأذانات أخرى لمساجد قريبة وبعيدة .. قلت لأخي بعد سماعي  لصوت  شاب يؤذن ..

-         تعرف انتوا مرة في نعمة كبيرة أنكم تأذنوا

-         - ليش يعني؟؟

-         أنا مرره نفسي أأذن أحس بروحانية كبيرة لما الواحد يرفع صوت الحق بنفسه

-         اممم هوا صح شي حلو بس مو كل واحد يأذن ..يعني أنا صوتي مو حلو عشان كدا ماابغى ااذن ..

-         والصوت الحلو شرط؟؟

-         طبعا لازم الواحد يكون صوته حلو ويفهم في المقامات كويس

-         هذا لما الواحد يبغى يكون محترف لكن إذا كان مجرد تجربة ؟؟

-         على الأقل يكون عنده خلفية في المقامات .. يعني شوفي دا اللي بيأذن مررة بيغلط كثير

-         < <<استفزاز.. على الأقل بادر وأذن!!

-         بس أحنا في مكة اش يقولوا علينا الحجاج لما يسمعوا أذان زي كدا ؟؟

-         بس برضو أنا مرة نفسي ااذن .. أقلك هات المايك أبغى ااذن .. أبغى اسمع صوتي ..

-         خدي .. اش ح تأذني ؟؟ اذني زي المصارية مرة يعجبني ..

-         اللي اعرفه حأاذنه !!

…..

ها اش رأيكم ياجماعة .. عمركم اذنتوا .. انتوا ياشباب .. عمرك فكرت تأذن في مسجد الحي بتاعكم .. طيب لما تكونوا في جمعة ويجي وقت الصلاة عمرك اذنت ؟؟

انتوا يابنات عمركم اشتهيتوا تاذنوا .. إذا ايوة عمركم اذنتوا ??.. في البيت أو سجلتوا صوتكم ؟؟؟!!

في احد زيي مشتهي يأذن ولا بس أنا لحالي ؟؟؟؟

لما كنت في أولى ثانوي شفت حلقة للدكتور الشيخ :علي أبو الحسن

أتطرق لهذا الموضوع(كان الكلام للشباب فقط) وكانت حلقة في رمضان واقتراح لمشروع في دا الشهر ..

هذي الحلقة عززت في نفسي حب الأذان

 (للأسف مالقيت رابط للحلقة .. اللي يعرف يااايرت يديني )

رابط تاني … الشيخ الملا .. أمام الحرم المكي .. صوت رائع وجبار ..

 http://www.alsound.com/download.php?image_id=159

المجال مفتوح لكم … ابغي رأيكم..